【Now Sports】香港乒乓球代表隊今日舉行征戰巴黎奧運的記招，5名港隊球手席上分享備戰狀態及目標。
今屆港乒有5名球手出戰4個奧運項目，分別是男單的黃鎮廷、女單的杜凱琹及朱成竹、女團的杜凱琹、李皓晴、朱成竹及後備的吳詠琳，以及混雙的黃鎮廷/杜凱琹。
港隊總教練李靜談及本屆目標時笑言：「盡擸獎金！拎百幾萬返香港，因為獎金攞得愈多啫係成績愈好。有少少遺憾嘅係男團今屆入唔到，而上屆嘅團體同混雙攞到前8，希望今屆可以行前多少少，對我同球員嚟講都係一個交代，因為大家都努力付出咗好多。」
「靜哥」坦言對球員充滿信心：「雖然呢幾年好多國家投放比以往更多嘅資源落混雙，所以混雙嘅比賽比以往難咗，不過我哋今屆混雙同女雙分別被列為4號同6號種子，證明我哋係有實力嘅，同埋依加嗰狀態係高水準，加上團隊士氣非常好，呢個係最大強心針。」
該名2004年奧運男雙銀牌得主將盡力為球員減壓：「雖然場內外我都唔會頂得晒啲壓力，我會盡量同球員傾多啲計，幫佢哋放鬆。之前佢哋一落場就有想贏怕輸嘅心態，令表現唔好，今次再有運動心理學家隨行，希望減輕球員對贏輸嘅執著，可以令佢哋更加享受比賽，咁我哋就能有精彩表現。」
杜凱琹繼東奧後再次兼戰女單、女團及混雙，27歲的她坦言自己長期緊張：「喺呢半年備戰期間，發覺自己唔識放鬆，試過做物理治療嗰陣，以為自己已經放鬆咗肌肉，但原來係無，發現自己長期處於一個繃緊狀態，好多謝瑞姐（張瑞教練）好支持我，令我可以慢慢學識放鬆。」
「阿杜」亦談及今屆奧運目標：「上屆成個腦都係諗爭牌，結果表現唔好，所以呢次當每一分都係Bonus，加上我同廷哥愈夾愈好之下，今屆唔想再留遺憾。」
3次征奧的黃鎮廷上屆夥拍杜凱琹出戰混雙，惜8強止步，他坦言此行征奧之鵠的：「我32歲年紀都唔細，都唔知仲有無下屆，所以我同阿杜都達成共識，大家已經重整好自己，要再次衝擊獎牌。同埋都睇籤運啦，最好嘅奧運男單成績係前16名，希望呢次放鬆啲，一分一分咁攞，一場一場咁打，盡量去遠啲。」